4. ദേശീയ അന്തര്‍ദേശീയ കാര്യങ്ങള്‍

പോളിസി

(എ)     ഇസ്‌ലാമികാധ്യാപനങ്ങളുടെ വെളിച്ചത്തില്‍ നീതിന്യായം, ശാന്തിസമാധാന ധാര്‍മിക മൂല്യങ്ങള്‍ എന്നിവ അടിസ്ഥാനമാക്കി രാജ്യത്തിന്റെ ബഹുമുഖമായ നിര്‍മാണത്തിനും പുരോഗതിക്കും വേണ്ടി ജമാഅത്തെ ഇസ്‌ലാമി പരിശ്രമിക്കും. ദേശീയ രാഷ്ട്രീയത്തില്‍ വിശുദ്ധ മൂല്യങ്ങളുടെ വിപുലനത്തിനും ദുര്‍ബല വിഭാഗങ്ങളോടുള്ള അവഗണന ഇല്ലാതാക്കാനും ശ്രമിക്കും. ലോകസാമ്രാജ്യത്വത്തിന്റെയും സാമ്പത്തിക ക്രമത്തിന്റെയും സങ്കുചിത ദേശീയതയുടെയും അധിനിവേശത്തില്‍നിന്ന് രാജ്യത്തെ മോചിപ്പിക്കാനായി നന്മേഛുക്കളായ എല്ലാ വിഭാഗങ്ങളുടെയും പിന്തുണ നേടാന്‍ ജമാഅത്ത് ശ്രമിക്കുന്നതാണ്.

(ബി) അന്തര്‍ദേശീയ തലത്തില്‍ രാഷ്ട്രീയ സാമ്പത്തിക സാംസ്‌കാരിക അധിനിവേശത്തില്‍നിന്നുള്ള സ്വാതന്ത്ര്യം, ഏകാധിപത്യത്തില്‍നിന്നും സ്വേഛാധിപത്യത്തില്‍നിന്നുമുള്ള മോചനം, മനുഷ്യാവകാശങ്ങളോടുള്ള ആദരവ്, നീതിന്യായത്തിന്റെയും ലോകസമാധാനത്തിന്റെയും സംസ്ഥാപനം എന്നിവയെ ജമാഅത്ത് ശക്തിപ്പെടുത്താന്‍ ശ്രമിക്കും. മുസ്‌ലിംലോകത്ത് ബഹുജന താല്‍പര്യങ്ങള്‍ സംരക്ഷിക്കുകയും ഇസ്‌ലാമിക സാമൂഹ്യക്രമം പുനര്‍നിര്‍മിക്കാന്‍ പരിശ്രമിക്കുന്നതുമായ പ്രസ്ഥാനങ്ങളെ ജമാഅത്ത് പിന്തുണക്കുകയും അവര്‍ക്ക് നേരെയുള്ള അക്രമങ്ങള്‍ക്കെതിരില്‍ ശബ്ദമുയര്‍ത്തുകയും ചെയ്യും. ഇസ്‌ലാമിക ലോകത്തെ നിലനില്‍ക്കുന്ന മദ്ഹബീ ഛിദ്രതയില്‍നിന്നും അധിനിവേശ ശക്തികളുടെ കുതന്ത്രങ്ങളില്‍നിന്നും മോചിപ്പിച്ച് ഐക്യപ്പെടുത്താന്‍ ആവുന്നത്ര ശ്രമിക്കും.

  പോളിസി താല്‍പര്യങ്ങള്‍
(എ) 

  1. രാജ്യത്തെ മുഴുവന്‍ നിവാസികളും ചേര്‍ന്ന് ധാര്‍മിക മൂല്യങ്ങളിലധിഷ്ഠിതവും നീതിയും ന്യായവും നിലനില്‍ക്കുന്നതും അനാരോഗ്യകരമായ സാമ്പത്തിക സാമൂഹ്യാസമത്വങ്ങള്‍ ഇല്ലാത്തതുമായ ഒരു സമൂഹത്തെ നിര്‍മിക്കുക. അതിന് ജമാഅത്തെ ഇസ്‌ലാമി മാര്‍ഗ നിര്‍ദേശം സമര്‍പ്പിക്കും.
  2. വര്‍ഗീയതയും ഫാഷിസവും ഉന്മൂലനം ചെയ്യാന്‍ എല്ലാതലത്തിലുമുള്ള ശ്രമങ്ങള്‍ നടത്തുക. ജനാധിപത്യ മൂല്യങ്ങളുടെ വളര്‍ച്ചക്കും രാജ്യത്തെ വിവിധ സാംസ്‌കാരിക വിഭാഗങ്ങള്‍ക്ക് നീതി ലഭ്യമാക്കാനും വേണ്ടി പൊതുജനാഭിപ്രായം രൂപീകരിക്കുക. ഇക്കാര്യത്തിനായി നിയമനിര്‍മാണ സഭകളിലേക്കുള്ള തെരഞ്ഞെടുപ്പുകളില്‍ ശരിയായ ദിശയില്‍ സ്വാധീനം ചെലുത്താന്‍ ശ്രമിക്കുക.
  3. വര്‍ധിച്ചുവരുന്ന തീവ്രവാദ-ഭീകരവാദ പ്രവണതകളെയും സര്‍ക്കാര്‍ തലത്തിലുള്ള മനുഷ്യാവകാശ ധ്വംസനങ്ങളെയും ശക്തിയായി അപലപിക്കുക. ഭീകരവാദത്തിന്റെ യഥാര്‍ഥ കാരണം  കണ്ടെത്തി അത് ഇല്ലാതാക്കുന്നതിനായി ശ്രമിക്കുക. ന്യായമായ അവകാശങ്ങള്‍ നേടിയെടുക്കാനായി സമാധാന മാര്‍ഗങ്ങള്‍ സ്വീകരിക്കേണ്ടതിന്റെ ആവശ്യകത രാജ്യനിവാസികളെ ബോധ്യപ്പെടുത്തുക.
  4. രാജ്യത്തിന്റെ മര്‍മ പ്രധാന വ്യവഹാരങ്ങളിലും വിദേശനയത്തിലും സാമ്രാജ്യത്വശക്തികളുടെ വര്‍ധിച്ചുവരുന്ന സ്വാധീനത്തെ എതിര്‍ക്കുക. സ്വതന്ത്രവും നീതിപൂര്‍വകവുമായ നയം സ്വീകരിക്കേണ്ടതിന്റെ ആവശ്യകത ബോധ്യപ്പെടുത്തുക.
  5. പരിസ്ഥിതി പ്രശ്‌നങ്ങള്‍ക്കുള്ള ഇസ്‌ലാമിക പരിഹാരംനിര്‍ദേശിക്കുക.
  6. സാമ്പത്തിക ചൂഷണത്തിനെതിരെ ശ്രമങ്ങള്‍ തുടരുക.ഇസ്ലാമിക സാമ്പത്തിക ക്രമത്തെ ഏക ബദല്‍ വ്യവസ്ഥയായി സമര്‍പിക്കുക. ഇസ്‌ലാമിക സാമ്പത്തികാധ്യാപനങ്ങളുടെ വെളിച്ചത്തില്‍ ശരിയായ സാമ്പത്തിക നയം നിര്‍ദേശിക്കുക. രാജ്യത്ത് സാമ്പത്തിക നീതി സ്ഥാപിക്കാന്‍ വേണ്ട വഴിയൊരുക്കുക.
  7. സ്ത്രീകള്‍ക്കെതിരെയുള്ള അതിക്രമങ്ങള്‍ക്കും ഭ്രൂണഹത്യക്കുമെതിരെ പൊതുജനാഭിപ്രായം സ്വരൂപിക്കുക.

    (ബി)

  1. സാമ്രാജ്യത്വശക്തികള്‍ സ്വതന്ത്ര രാഷ്ട്രങ്ങളുടെ മേല്‍ കടന്നുകയറുകയും അധീശത്വം സ്ഥാപിക്കാന്‍ ശ്രമിക്കുകയും ചെയ്യുന്നതിനെ ജമാഅത്ത് അപലപിക്കും. ന്യായമായ അവകാശങ്ങള്‍ ചോദിക്കുന്നവരെ മര്‍ദനപീഢനങ്ങള്‍ക്കിരയാക്കുകയും ഭീകരവാദികളാക്കുകയും ചെയ്യുന്നതിനെ ജമാഅത്ത് എതിര്‍ക്കും.
  2. സ്വതന്ത്ര ഫലസ്തീന്‍ രാഷ്ട്രത്തിനുള്ള പിന്തുണ തുടരും. ഫലസ്തീന്റെ സമ്പൂര്‍ണ സ്വാതന്ത്ര്യത്തിനുള്ള ശ്രമങ്ങളെ പിന്തുണക്കുകയും പൊതുസമൂഹത്തിന് നേരെയുള്ള അതിക്രമങ്ങളെ അപലപിക്കുകയും ചെയ്യും.
  3. നാട്ടില്‍ നടമാടുന്ന അഴിമതിക്കെതിരെ ശബ്ദമുയര്‍ത്തും. ദൈവഭയവും പരലോകത്ത് മറുപടി പറയണമെന്ന ബോധവും ഫലപ്രദമായ ആത്മപരിശോധന സംവിധാനവുമല്ലാതെ ഈ പ്രശ്‌നത്തിന് പരിഹാരമില്ലെന്ന യഥാര്‍ഥ്യം ബോധ്യപ്പെടുത്തും.

ടാര്‍ഗറ്റ് 

  1. ഇസ്‌ലാമിക് ബാങ്കിംഗ്, ഇസ്‌ലാമിക സമ്പദ്ഘടന എന്നിവയുമായി ബന്ധപ്പെട്ട് നയരൂപീകരണ സ്ഥാപനങ്ങളിലും പൊതുസമൂഹത്തിലും അഭിപ്രായരൂപീകരണത്തിന് ശ്രമിക്കും. അതുവഴി ഇസ്‌ലാമിക ബാങ്ക് രൂപീകരിക്കാനും പലിശരഹിത എക്കൗണ്ടുകള്‍ തുടങ്ങാനും ഇസ്‌ലാമിക സാമ്പത്തിക ബദല്‍ ഉല്പന്നങ്ങള്‍ പ്രാബല്യത്തില്‍ വരുത്താനും സാധിക്കും.
  2. പൗരാവകാശ സംരക്ഷണത്തിനും നിയമസഹായത്തിനുംവേണ്ടി ഓരോ സ്റ്റേറ്റിലും ഓരോ സ്ഥാപനങ്ങള്‍ തുടങ്ങുമെന്ന കാര്യം ഉറപ്പുവരുത്തും.
  3. രാജ്യത്തെ അമ്പത് തെരഞ്ഞെടുത്ത നഗരങ്ങളെ/ഗ്രാമങ്ങളെ പൂര്‍ണമായും മദ്യലഹരി മുക്തമാക്കുകയെന്ന ലക്ഷ്യം നേടും.
  4. രാജ്യത്തെ അമ്പത് ഗ്രാമങ്ങള്‍ തെരഞ്ഞെടുത്ത് അവയെ മാതൃകാ ഗ്രാമങ്ങളാക്കും. അതിന്റെ വിശദമായ പ്ലാന്‍ മര്‍കസ് തയ്യാറാക്കും.

 പ്രോഗ്രാം

  1. ബ്യൂറോക്രാറ്റുകളും പോലീസ് ഓഫീസര്‍മാരുമടക്കമുള്ള ഉദ്യോഗസ്ഥരുമായും രാഷ്ട്രീയക്കാരുമായും സ്വതന്ത്രവും ലക്ഷ്യപൂര്‍ണവുമായ ബന്ധം സ്ഥാപിക്കുന്നതിനായി ഓരോ സ്റ്റേറ്റിലും അനുയയോജ്യരായ വ്യക്തികളുടെ ഗ്രൂപ്പ് തയ്യാറാക്കും. സംഘടനകളുമായും സ്ഥാപനങ്ങളുമായും എന്‍.ജി.ഒകളുമായും ബന്ധം പുലര്‍ത്താന്‍ വേണ്ടിയും ഈ ഗ്രൂപ്പിനെ സജ്ജമാക്കും.
  2. ഇസ്‌ലാമിന്റെയും മുസ്‌ലിംകളുടെയും ചരിത്രം വികൃതമാക്കുന്നതിനായുള്ള പരിശ്രമങ്ങളെ പരാജയപ്പെടുത്തുന്നതിനായി ഹിസ്റ്ററി കോണ്‍ഫറന്‍സ്‌പോലുള്ള വൈജ്ഞാനിക പരിപാടികള്‍ സംഘടിപ്പിക്കും.
  3. പത്താം ക്ലാസ്‌വരെയുള്ള പാഠപുസ്തകങ്ങള്‍ തയ്യാറാക്കുന്ന പ്രവൃത്തി പൂര്‍ത്തീകരിക്കും. അവ ഇംഗ്ലീഷ്, ഹിന്ദി, ഉര്‍ദു ഭാഷകളില്‍ ലഭ്യമാക്കും.
  4. ഇസ്‌ലാമിക് ബാങ്കിംഗ് സങ്കല്‍പം വൈജ്ഞാനിക-നയരൂപീകരണ വൃത്തങ്ങളില്‍ സ്വീകാര്യമാക്കാനുള്ള ശ്രമങ്ങള്‍ തുടരും
  5. മീഡിയാ പ്രൊഡക്ഷന്‍ ഹൗസിലൂടെ വിദ്യാര്‍ഥികള്‍ക്കും യുവാക്കള്‍ക്കും പ്രയോജനകരമായ ആനിമേഷന്‍, ഷോര്‍ട്ട് 
  6. ക്ലിപ്‌സ് തുടങ്ങിയ മെറ്റീരിയല്‍സ് തയ്യാറാക്കും.
  7. സുപ്രധാന പ്രശ്‌നങ്ങളില്‍ ജമാഅത്തിന്റെ നിലപാട് വ്യക്തമാക്കുന്ന ലഘുപുസ്തകങ്ങള്‍ പ്രസിദ്ധീകരിക്കും.
  8. രാജ്യത്ത് സമാധാനപൂര്‍ണമായ അന്തരീക്ഷം സൃഷ്ടിക്കുന്നതിനായി സദ്ഭാവനാ മഞ്ച് പോലെ പ്രാദേശിക ഫോറങ്ങള്‍ രൂപീകരിക്കും.

കേരള പ്രോഗ്രാം

  1. സമുദായ സൗഹാര്‍ദ പ്രവര്‍ത്തനങ്ങള്‍ മുന്‍കാലങ്ങളെക്കാള്‍ പ്രധാനമായിത്തീര്‍ന്ന സാഹചര്യത്തില്‍ പൊതുസമൂഹ ബന്ധങ്ങള്‍ കൂടുതല്‍ വ്യാപകവും ദൃഢവുമാക്കാന്‍ പരിശ്രമിക്കും.
  2. എഫ്.ഡി.സി.എ. പ്രവര്‍ത്തനങ്ങള്‍ കൂടുതല്‍ സജീവമാക്കും.
  3. നീതി നിഷേധങ്ങളെ ചെറുക്കുകയും മനുഷ്യാവകാശലംഘനങ്ങള്‍ ബഹുജന ശ്രദ്ധയില്‍കൊണ്ടുവരികയും ചെയ്യും.
  4. എ.പി.സി.ആര്‍ന്റെ കേരള ചാപ്റ്റര്‍ രൂപീകരിക്കും
  5. കേന്ദ്രപോളിസിയും, താല്‍പര്യങ്ങളും പരിഗണിച്ച് ആവശ്യാനുസൃതം പ്രവര്‍ത്തനങ്ങള്‍ ആവിഷ്‌കരിക്കും.
  6. പ്രസ്ഥാന താല്‍പര്യങ്ങളും തീരുമാനങ്ങളും ജനങ്ങളിലെത്തിക്കാന്‍ നമ്മുടെ മീഡിയകള്‍ കൂടുതല്‍ ഫലപ്രദമായി ഉപയോഗപ്പെടുത്തും.
     

    <<<2015-2019 പോളിസി പ്രോഗ്രാം ഊന്നലുകള്‍

    <<<1. ദഅ്‌വത്ത് 

    >>> 2. ഇസ്‌ലാമിക സമൂഹം 

    <<<3. സമുദായ സംരക്ഷണവും  പുരോഗതിയും

    4. ദേശീയ അന്തര്‍ദേശീയ കാര്യങ്ങള്‍

    >>>5. ജനസേവനം  

    >>>6. തര്‍ബിയത്തും തസ്‌കിയത്തും  

    >>>7. സംഘടന 

    >>>8. മറ്റു വകുപ്പുകൾ