പിന്നീട് കേരളത്തിൽ തിരിച്ചെത്തിയ ഹാജിസാഹിബ് 1944 ല്‍ ഒരു സ്വതന്ത്ര്യവേദിക്ക് രൂപം നല്‍കിയിരുന്നു. ജമാഅത്തുല്‍ മുസ്തര്‍ശിദീന്‍ എന്നായിരുന്നു അതിന്റെ പേര്.

നാല്‍പതോളം പേര്‍ ജമാഅത്തുല്‍ മുസ്തര്‍ശിദീനില്‍ സഹകരിച്ച് പ്രവര്‍ത്തിച്ചിരുന്നു. അവര്‍ക്കെല്ലാം ഹാജിസാഹിബ് ജമാഅത്തെ ഇസ്‌ലാമിയെ പരിചയപ്പെടുത്തി. നേരത്തെ വിവർത്തനം ചെയ്ത പുസ്തകങ്ങൾ മലയാളത്തിൽ പ്രസിദ്ധീകരിക്കുന്നത് ഇക്കാലത്താണ്. 1945 ൽ പുറത്തിറങ്ങിയ ഇസ്ലാമിക് പബ്ലിഷിങ്ങ് ഹൗസിൻ്റെ ഒന്നാമത്തെ പ്രസിദ്ധീകരണമായ 'ഇസ്ലാം മതം' ആയിരുന്നു അതിലൊന്ന്. അധികം താമസിയാതെ ‘രക്ഷാസരണി’ യും പ്രസിദ്ധീകരിക്കപ്പെട്ടു. അക്കാലത്ത് ഐ.പി.എച്ചിൻ്റെ ആസ്ഥാനം ഹാജി സാഹിബ് ഖുത്തുബ നിർവഹിച്ചിരുന്ന ഇരിമ്പിളിയത്തെ കൊച്ചുപള്ളിയിലെ ഇടുങ്ങിയ മുറിയിലെ മുരിക്കിൻ പെട്ടിയായിരുന്നു.