State News

സംസ്ഥാന കാംപസ് കോണ്‍ഫറന്‍സ് ഡിസംബര്‍ 22,23 തിയ്യതികളില്‍ ശാന്തപുരത്ത്‌

കോഴിക്കോട് : എസ്.ഐ.ഒ വും ജി.ഐ.യും സംയുക്തമായി സംഘടിപ്പിക്കുന്ന സംസ്ഥാന കാംപസ് കോണ്ഫറന്‍സ് ”സൗന്ദര്യമുള്ള ജീവിതത്തിന് വിശ്വാസത്തിന്റെ കരുത്ത്” എന്ന തലക്കെട്ടില്‍ ഡിസംബര്‍ 22,23 തിയ്യതികളില്‍ ശാന്തപുരം അല്‍ ജാമിഅ അല്‍ ഇസ്ലാമിയയില്‍ നടക്കുമെന്ന് ജമാഅത്തെ ഇസ്ലാമി സംസ്ഥാന ജനറല്‍ സെക്രട്ടറി എം.കെ മുഹമ്മദലി പ്രഖ്യാപിച്ചു. കട്ടാങ്ങല്‍ ഐഡിയല്‍ സെന്ററില്‍ വെച്ച് നടന്ന പ്രഖ്യാപന സമ്മേളനം ഉദ്ഘാടനം നിര്‍വ്വഹിച്ചു സംസാരിക്കുകയായിരുന്നു അദ്ദേഹം. സമൂഹത്തിന്റെ കെട്ടുറപ്പിന് വിശ്വാസത്തിന്റെയും സദാചാരത്തിന്റെയും അടിസ്ഥാനത്തിലുള്ള ജീവിത കാഴ്ചപ്പാട് അനിവാര്യമെന്ന് അദ്ദേഹം പറഞ്ഞു. മൂല്യങ്ങളില്‍ നിന്ന് വ്യതിചലിച്ച് കൊണ്ടിരിക്കുന്ന പുതിയ കാലത്തെ വിശ്വാസത്തിന്റെ കരുത്ത് കൊണ്ട് നേരിട്ട് സൗന്ദര്യമുള്ള ജീവിതം കെട്ടിപ്പടുക്കുവാന്‍ വിദ്യാര്‍ഥി സമൂഹത്തിന് സാധിക്കണമെന്നും അദ്ദേഹം കൂട്ടിച്ചേര്‍ത്തു. അസഹിഷ്ണുതയില്‍ ഊന്നിയുള്ള സംഘ്പരിവാറിന്റെ ഫാസിസ്റ്റ് പ്രത്യയശാസ്ത്രത്തെ പരസ്പര സാഹോദര്യത്തിന്റെയും സ്‌നേഹത്തിന്റെയും അടിസ്ഥാനത്തില്‍ ഊന്നിയുള്ള ഇസ്‌ലാമിക അധ്യാപനങ്ങള്‍ ഉയര്‍ത്തിപ്പിടിച്ച് നേരിടുവാന്‍ വിശ്വാസി സമൂഹത്തിന് സാധിക്കേണ്ടത്. ലിബറല്‍ ജീവിത വ്യവസ്ഥകള്‍ മുന്നോട്ട് വെക്കുന്ന അതിരുകളില്ലാത്ത ആസ്വാദനങ്ങളിലൂടെ സഞ്ചരിക്കാനല്ല, മനുഷ്യ നന്മക്കായി പ്രകൃതിയുടെ ക്രമത്തിന് അനുസൃതമായി ദൈവം നല്‍കിയ മാര്‍ഗ്ഗ നിര്‍ദ്ദേശങ്ങള്‍ അനുധാവനം ചെയ്യുക എന്നത് വിശ്വാസിയുടെ ബാധ്യതയാണെന്നും അദ്ദേഹം കൂട്ടിച്ചേര്‍ത്തു.

സോളിഡാരിറ്റി സംസ്ഥാന ജനറല്‍ സെക്രട്ടറി ഉമര്‍ ആലത്തൂര്‍, എസ്.ഐ.ഒ സംസ്ഥാന പ്രസിഡന്റ് സി.ടി സുഹൈബ്, ജി.ഐ.ഒ സംസ്ഥാന പ്രസിഡന്റ് അഫീദ അഹമ്മദ്, ജമാഅത്തെ ഇസ്‌ലാമി ജില്ലാ വൈസ് പ്രസിഡന്റ് എം.സി സുബ്ഹാന്‍ ബാബു എന്നിവര്‍ പ്രഖ്യാപന സമ്മേളനത്തെ അഭിസംബോധനം ചെയ്ത് സംസാരിച്ചു. എസ്.ഐ.ഒ സംസ്ഥാന ജനറല്‍ സെക്രട്ടറി തൗഫീഖ് മമ്പാട് അധ്യക്ഷത വഹിച്ച പരിപാടിയില്‍ ജി.ഐ.ഒ സംസ്ഥാന ശൂറ അംഗം തസ്‌നി സ്വാഗതവും എസ്.ഐ.ഒ സംസ്ഥാന സെക്രട്ടറി ശബീര്‍ കൊടുവള്ളി നന്ദിയും പറഞ്ഞു.

Comment here